一連兩日嘅西文BB班考試終於結束！筆試係考幾好嘅，不過口試就...
邪就邪在要同個波蘭妹同學仔做role play, 佢扮病人我扮醫生，
「病人你見邊度唔舒服？」
「我頭暈，感冒不過唔食感冒藥，又腰骨痛」
「咁我開啲止痛藥俾你先」
「但我一食止痛藥就胃痛喎。」
... 咁 ...
即使用我嘅母語即粵語講都未諗到點答佢。
我真心相信如果我用西文讀醫兩三年咁上下，應該解答到波蘭妹嘅疑難。
畢竟我落地唔夠兩個月，算吧啦。
意佬知道我考試成績後，大讚我叻叻，不過我話其實唔係咁滿意（完美主義病發作）。
佢堅持帶我去鋸扒慶祝，仲喺塊5cm厚嘅牛眼扒前同我講：
“其實你由一隻字都唔識，用一個月時間考到95分，亦見你開始聽得明少少，已經好叻叻。
再者，為咗陪我去到世界另一邊生活，努力學習新環境、新語言、新文化，你已是我100分的準太太。”
衰嘢，呢晚做乜把口浪過油，哄到我以爲自己真係攞滿分！不過其實我都想同意佬講：
沒有你，縱使我做得夠完美，都只有95分。
那五分，在我未遇上你之前，亦只有撲空。
有了你，我仍未必完美；
但有了你，我的人生一定是最美。
我會繼續努力，升呢讀上去。等你日頭埋頭苦幹工作嘅時候，唔洗擔心我一個人在外闖蕩。
#做你95分的準太太
#脫離西班牙文盲
#bereadyforspanishgrade2
Search